म्याग्दी। मालिका गाउँपालिका–३ स्थित लुक्सीपारमा ‘एक घर, एक धारा’ कार्यक्रमअन्तर्गत करिब रु ३९ लाख २३ हजारको लागतमा खानेपानी आयोजना निर्माण सम्पन्न भएको छ। उक्त आयोजनाबाट करिब ४०० स्थानीयवासी प्रत्यक्ष रूपमा लाभान्वित भएका छन्।

नेपाल स्वास्थ्यका लागि पानी (नेवा) संस्थाले रु १७ लाख ७४ हजार ७२९, मालिका गाउँपालिकाले रु ९ लाख ९५ हजार ५०९, र स्थानीय उपभोक्ताले श्रमदानमार्फत रु ११ लाख ५३ हजार २५० बराबरको योगदान दिएर आयोजना सम्पन्न भएको नेवाका प्राविधिक रुपक थापाले जानकारी दिए।

चालु आर्थिक वर्ष २०८१/८२ मा मालिका गाउँपालिका र नेवाको सहकार्यमा वडा नं. ३ का पात्ले, लुक्सीपार र डाँडागाउँमा गरी तीन वटा खानेपानी योजना निर्माण गरिएको वडाध्यक्ष मोतीप्रसाद बुढाले बताए।

यी योजनाबाट डाँडागाउँ, किटेनी, औल, सराग्दी, स्यागलुङ, पात्ले र लुक्सीपार टोलमा बसोबास गर्ने करिब ४०० परिवारमा खानेपानीको पहुँच विस्तार भएको उनी बताए। वडाध्यक्ष बुढाका अनुसार यस आयोजनाले महिलाहरूको श्रम भार कम हुनुका साथै बालबालिकाको स्वास्थ्यमै सुधार ल्याउने अपेक्षा गरिएको छ।