उज्यालो प्रतिनिधि
नुवाकोट ।आगामी फागुन २१ गते हुने प्रतिनिधिसभा सदस्य निर्वाचनको प्रचारप्रसारका लागि घरदैलो अभियानमा रहेका नेपाली कम्युनिष्ट पार्टीका उम्मेदवार हितबहादुर तामाङको पक्षमा ककनीमा जनलहर देखिएको छ।
वडा नं. २ र ३ मा एमाले-कांग्रेसलाई धक्का
निर्वाचनको मुखैमा ककनी गाउँपालिकाका विभिन्न वडामा अन्य दल परित्याग गरी नेपाली कम्युनिष्ट पार्टीमा प्रवेश गर्नेहरूको संख्या बढेको छ।
वडा नं. २: मतदाता भेटघाट कार्यक्रमकै बीच नेपाली कांग्रेस र नेकपा एमालेका दर्जनभन्दा बढी प्रभावशाली स्थानीय नेता तथा कार्यकर्ताहरू आफ्नो पुरानो दल त्यागी नेपाली कम्युनिष्ट पार्टीमा प्रवेश गरेका छन्।
वडा नं. ३: यस वडामा पनि नेकपा एमाले र नेपाली कांग्रेसका दर्जनौं कार्यकर्ताहरूले पार्टी परित्याग गरी वाम एकताको पक्षमा उभिने घोषणा गर्दै नयाँ पार्टीमा प्रवेश गरेका छन्।
नवप्रवेशीहरूलाई उम्मेदवार हितबहादुर तामाङ र पार्टीका अन्य स्थानीय नेताहरूले खादा र अबिर लगाएर हार्दिक स्वागत गर्दै पार्टीमा उचित जिम्मेवारी दिइने प्रतिबद्धता जनाउनुभयो।
उम्मेदवार हितबहादुर तामाङको घरदैलो: जनतामा उत्साह
नुवाकोट क्षेत्र नम्बर १ का उम्मेदवार हितबहादुर तामाङ अहिले ककनीका गाउँ-गाउँमा पुगेर मतदाताको आशीर्वाद लिइरहनुभएको छ। ककनीका विभिन्न टोलहरूमा भएको घरदैलो कार्यक्रममा जनताको उत्साहपूर्ण सहभागिता रहेको देखिन्छ।
स्थानीय बासिन्दाहरूले विकास निर्माण, सडक स्तरोन्नति र कृषि क्षेत्रमा सुधारको अपेक्षासहित तामाङलाई स्वागत गरिरहेका छन्। तामाङले जनताको विश्वासलाई टुट्न नदिने र अधुरा कामहरू पूरा गर्ने प्रतिबद्धता व्यक्त गर्नुभएको छ।
”जनताको यो अपार माया र अन्य दलबाट भइरहेको सामूहिक प्रवेशले हाम्रो जित सुनिश्चित भएको छ। फागुन २१ गतेको निर्वाचनले मुलुकमा नयाँ राजनीतिक दिशा तय गर्नेछ।”
निर्वाचनको तयारी र माहोल
फागुन २१ गते हुने निर्वाचनका लागि अब केही दिन मात्र बाँकी रहँदा ककनीमा नेपाली कम्युनिष्ट पार्टीको पकड बलियो बन्दै गएको दाबी नेताहरूले गरेका छन्। पार्टीका कार्यकर्ताहरू ‘एक घर, एक मत’ अभियानमा जुटेका छन् भने विपक्षी दलहरूमा भने यो प्रवेशको लहरले केही दबाब सृजना गरेको देखिन्छ।
बुद्ध लोप्चन