उज्यालो प्रतिनिधि
गलकोट (बागलुङ) । विदेशी पर्यटक कम भित्रने बागलुङमा यस वर्ष आन्तरिक पर्यटकको सङ्ख्या ह्वात्तै बढेको छ। अध्ययन, अवलोकन भ्रमण र तीर्थयात्राका लागि देशभित्रका पर्यटक बागलुङलाई नवौं गन्तव्यका रूपमा रोज्न थालेका हुन्।
प्रसिद्ध धार्मिकस्थल कालिका मन्दिर, पञ्चकोट तथा कुडुँलेस्थित शालग्राम सङ्ग्रहालय परिसरमा दैनिक सयौँ सङ्ख्यामा सवारी साधन र पर्यटक देखिने गरेका छन्। पर्यटक बढेसँगै कालिका मन्दिर परिसरको पार्किङ व्यवस्थापनमा पनि समस्या देखिन थालेको छ। नेपालकै सबैभन्दा लामो झोलुङ्गे पुल, भैरवस्थान मन्दिर, गाईघाट झरना र ढोरपाटन सिकार आरक्षसमेत पुग्ने पर्यटकको वार्षिक आगमनमा उल्लेख्य वृद्धि भएको छ।
विराटनगर र पोखरा आसपासका शैक्षिक संस्थाबाट हुने भ्रमण तथा देशका विभिन्न भागका तीर्थयात्रीले बागलुङका धार्मिक र पर्यटकीय स्थललाई प्राथमिकता दिन थालेका छन्। पञ्चकोट, बालाजीधाम मन्दिर र शालग्राम सङ्ग्रहालयमा दिनहुँ धार्मिक तथा पर्यटकको लर्को लागेको स्थानीय अर्जुन सापकोटाले बताए। गत वर्ष शालग्राम सङ्ग्रहालयमा दर्शन गर्न आएका पर्यटकको सङ्ख्या एक लाखभन्दा बढी थियो।
नवौँ नयाँ वर्ष २०८२ को पहिलो दिन कुडुँलेको शालग्राम शिलामा अहिलेसम्मकै उच्च सङ्ख्यामा आगन्तुक आएको उनले बताए। चैते दसैं यता विद्यालय र क्याम्पसहरूले शैक्षिक भ्रमणका लागि बागलुङ पठाएका कारण अधिकांश भ्रमण टोली पोखराबाट आएको र शालग्राम सङ्ग्रहालयमा ठाउँ समेत फेला नहुने अवस्था रहेको उनले जनाए। त्यहाँ आउने ५० प्रतिशत आन्तरिक पर्यटक मुस्ताङसम्म यात्रा विस्तार गर्ने गर्दछन्।
कालिका गुठी व्यवस्थापन समितिका अध्यक्ष कुमार खड्काले भने, “चैते दसैंदेखि हालसम्म करिब छ लाख पर्यटक कालिका मन्दिरमा पुगेका छन्। नयाँ वर्षका दिन मात्र होइन, अन्य सामान्य दिनहरूमा पनि मन्दिरमा भीड लागेको छ।”
पर्यटन व्यवसायी अर्जुन चोखालले बागलुङका होटलहरू अहिले यात्रुले भरिएका र प्रतिस्पर्धात्मक भाडाले पनि व्यावसायीहरूको उत्साह जगाएको बताए। नेपालका सय मुख्य पर्यटकीय गन्तव्य सूचीमा पञ्चकोट र कालिका मन्दिर समावेश भएकाले व्यवसायीहरूले विभिन्न प्याकेज र प्रचार–प्रसार थालेका हुन्।
शैक्षिक भ्रमण र तीर्थयात्राका अलावा मुस्ताङ यात्रा गर्दाताका पर्यटकलाई पनि यहाँका दृश्यावलोकनले आकर्षित गर्न थालेको पर्यटन व्यवसायीहरूले जनाएका छन्। यसरी आन्तरिक पर्यटकको आकर्षण बढेपछि बागलुङले आगामी सिजनमा थप आर्थिक प्रगति गर्ने अपेक्षा गरिएको छ।
बुद्ध लोप्चन