उज्यालो प्रतिनिधि
काभ्रे । काभ्रेपलाञ्चोक जिल्लाको डाँडापारि क्षेत्रमा पर्ने खानीखोला गाउँपालिकामा अविरल वर्षातसँगैको बाढी पहिरोका कारण एकजनाको मृत्यु भएको छ ।
बाढीले बगाएर बेपत्ता भएकी खानीखोला गाउँपालिका वडा नं. ०६ निवासी देवी माया सिंतानको शव हरिहरपुरगढी गाउँपालिका सिन्धुलीमा भेटिएको छ । ‘हरिहरपुरका अध्यक्षज्युले शव भेटिएको खबर दिनुभएको छ’ उद्धार र राहत वितरणमा सक्रिय खानीखोला गाउँपालिकाका अध्यक्ष इन्द्रबहादुर थिङ छिन्ताङले उज्यालो नेटवर्कसँग भने ।
अध्यक्ष थिङका अनुसार खानीखोला गाउँपालिकाका २६ घरधुरीमा पूर्ण रुपमा क्षति भएको छ । गाउँपालिकाको वडा नं. ५ मा ११ घर, वडा नं. ६ मा ८ घर, वडा नं. १ र २ मा २ घर, वडा नं. ७ मा ३ घर गरी २६ घर पूर्ण रुपले क्षति भएको छ । चौपाया र अन्य क्षतिको विवरण भने आउन बाँकी छ ।
यससँगै बाढी पहिरोका कारण गाउँपालिकाका सडक सञ्जाल पूर्ण रुपमा ध्वस्त भएको छ । ‘सडक सञ्जाल पूरै ध्वस्त बनेको छ’ अध्यक्ष थिङले भने, ‘बालीनाली र अन्य क्षतिको त हिसाब नै छैन ।’
उनका अनुसार तीन दर्जनभन्दा बढी सिँचाई र खानेपानीको आयोजना समेत क्षति भएको छ ।
बुद्ध लोप्चन
उज्यालो प्रतिनिधि