काठमाडौं । सर्विया पठाउने नाममा १३ जना युवाहरुलाई ठगी गरेको एचआर वल्र्ड सर्भिसेजमा छापा मारेर वैदेशिक रोजगार विभागको टोलीले चेक र कागजात बरामद गरेका छन् ।

बुधबार बिहान छापा हान्न पुगेको विभागको टोलीले मेनपावरबाट ६ लाखको चेक र वैदेशिक रोजगारसँग सम्बन्धित महत्त्वपूर्ण कागजात बरामद गरेका हुन् ।

‘हाम्रो टोली छापाका लागि एचआर वल्र्ड भन्ने मेनपावरमा पुगेर चेक र कागजात बरामद गरेर ल्याएका छौँ, भोली सोधपुछका लागि मेनपावर संचालक बबि थापालाई विभाग बोलाएका छौँ’ विभागका एकजना अधिकृतले भने, ‘पीडितको राहदानी एचआरका सञ्चालक बबि थापाले बुझेको पुष्टि भइसक्यो, आज हामीले राहदानी भेटेनौँ, उनले आफ्नो एजेन्टलाई बुझाएको प्रारम्भिक अनुसन्धानबाट खुलेको छ ।’

विभागले विस्तृत अध्ययन गरेर कारबाहीको प्रक्रिया अगाडि बढाउने भएको छ । विभागले यस सम्बन्धी छानबिनका लागि एउटा समिति नै बनाएको छ । विभागले पछिल्लो समय सर्वियाको नाममा ठगी बढेको भन्दै एचआरबाट पीडितहरुमाथि कुटपिट भएको घट्नाबारे पनि बुझ्ने बताएको छ । यसबारे भने नेपाल प्रहरीको एक ब्युरोले समेत अनुसन्धान गरिरहेको छ ।