उज्यालो प्रतिनिधि
काठमाडौं । पूर्वमन्त्री गोकुल बाँस्कोटा आफ्नो निर्वाचन क्षेत्रमा एक्लिएका छन् । काभ्रे क्षेत्र नम्बर २ बाट प्रतिनिधिसभामा निर्वाचित् बनेका गोकुलका क्षेत्रबाट प्रदेशमा जितेका दुवै सांसद्ले कित्ता क्लियर पारेसँगै गोकुल एक्लिएका हुन् ।
आफूले नेपालकै दोस्रो लोकप्रिय मत ल्याएर निर्वाचन जितेको धाक लगाउँदै आएका गोकुलका क्षेत्रका प्रदेश सांसद लक्ष्मण लम्साल र बसुन्धरा हुँमागाईले केन्द्रीय अध्यक्ष पुष्पकमल दाहाल प्रचण्ड र माधव नेपालको कित्ता रोजेपछि गोकुल एक्लिएका हुन् ।
प्रदेशका दुई सांसदमध्ये हुँमागाई बाँस्कोटा निकट थिए । तर, उनले कित्ता परिवर्तन गरेका छन् । र, आइतबार प्रचण्ड–नेपाल पक्षले आयोजना गरेको जिल्लास्तरीय अगुवा कार्यकर्ताको भेलामा उनले सम्बोधन गरेका छन् ।
भेलामा हुँमागाईले भने, ‘म कुनै पद र लोभको पछि लागेर प्रचण्ड–माधवको पक्षमा उभिएको होइन ।’
प्रदेश सांसदहरुले साथ छोडे सँगै गोकुलको नैतिक र वास्तविक धरातल कमजोर बनेको छ । काभ्रेमा जबर्जस्त प्रभाव जमाउन खोजेका बाँस्कोटा पार्टी विभाजनसँगै कमजोर बनेका छन् । उनी निकटका जिल्लाका कतिपय नेताहरु प्रचण्ड–माधवको पक्षमा उभिएका छन् ।
बुद्ध लोप्चन