रविन्द्र प्रताप गुप्ता
भैरहवा । लुम्बिनी प्रदेश सरकारको भूमिव्यवस्था, कृषि तथा सहकारी मन्त्रालयले ९ सय ८३ जना हरित स्वयंसेवक नियुक्त गरेको छ । हरित स्वयंसेवकको मद्दतले स्थानीयस्तरमा किसानलाई सरल, सहज र सुलभ तरिकाले कृषि प्रविधि हस्तान्तरण हुनेछ ।
निर्वाहमुखी कृषि प्रणालीलाई व्यवसायिक बनाउँदै, कृषि तथा पशु सेवा प्रवाहलाई स्थानीयस्तरमा पु¥याउन कार्यक्रमले सहयोग मिल्ने भेटेनरी अस्पताल तथा पशु सेवा विज्ञ केन्द्र भैरहवाका प्रमुख वरिष्ठ पशु विकास अधिकृत डा. परवेज आलमले बताए ।
नियुक्त भएका स्वयंसेवकले कृषि फार्म वा व्यवसाय सञ्चालन गरी नमुना कृषि उद्यमीको रुपमा आफ्नो पहिचान बनाउनुपर्ने भूमिव्यवस्था, कृषि तथा सहकारी मन्त्रालय वरिष्ठ पशु विकास अधिकृत डा. प्रदिप पौडेलले बताए ।
तालिममा सिकेका प्राविधिक ज्ञान आफ्नो क्षेत्रका किसानलाई सिकाउने तथा किसानलाई आवश्यक पर्ने उत्पादन सामग्रीको माग र आपूर्तिको व्यवस्थापन गर्न सहयोग गर्नुपर्ने देवदह नगरपालिकाका हरित स्वयंसेवक त्रिलोभन दाहालले बताए ।
प्रदेशमा रहेका १२ जिल्लाका ९ सय ८३ वडाबाट एक÷एक जना स्वयंसेवक छनोट गरिएको हो । ३५ वटा वडाबाट कसैको आवेदन नआएकाले पुन मागिएको मन्त्रालयले जनाएको छ ।
छनौट भएका स्वयंसेवकलाई कृषि ज्ञान केन्द्र र पशु सेवा विज्ञ केन्द्रहरुले उनीहरुले गर्ने काम र कर्तब्यबारे सिकाएका छन् । भैरहवामा रहेको भेटेनरी अस्पताल तथा पशु सेवा विज्ञ केन्द्रले रुपन्देहीका ५१ जना हरित स्वयंसेवकसंग सम्झौता गरी काममा खटाएको छ । हरित स्वयंसेवकले मासिक वा वार्षिक रुपमा तलब भत्ता पाउने छैनन् तर कृषि उद्यमी बन्नको लागि पहिलो वर्ष ५० हजार दोस्रो वर्ष ४० हजार र तेस्रो वर्ष ३० हजार रकम पाउनेछन् । कार्यक्रमका लागि तीन वर्षमा करिब १२ करोड रकम खर्च हुनेछ ।
उज्यालो प्रतिनिधि
बुद्ध लोप्चन