उज्यालो प्रतिनिधि
वासिङ्गटन । चर्चित दार्शनिक प्रोफेसर नोम चोम्स्कीले अमेरिकी राष्ट्रपति डोनाल्ड ट्रम्प हजारौं अमेरिकनको मृत्यूका लागि जिम्मेवार रहेको बताएका छन् । उनले कोरोना महामारीलाई ट्रम्पले आफ्नो चुनावी फाइदाका लागि प्रयोग गरेको बताएका छन् ।
देशका धनी कर्पोरेटहरुलाई सघाउन प्राणघातक रोगको स्वास्थ्य सुविधा र अनुसन्धानको सहायता कटौती गरेको ट्रम्पमाथि आरोप लागेको छ । प्रो. चोम्स्कीले गार्जियन न्यूज बेवसाइटसँग कुराकानी गर्दै भनेका छन्, ‘ट्रम्पले सामान्य अमेरिकनहरुको पिठ्यूँमा छुरा रोपिरहेको छन् र देशको रक्षक बनेको देखाउन खोजिरहेका छन् ।’
ट्रम्पले आफ्नो हरेक कार्यकालमा कोष कटौती गर्दै आएको उनले बताए । अहिले उनले यो क्रमलाई थप तिव्रता दिइरहेको बताए । ट्रम्पले यसलाई अझ अगाडि बढाउने र जनताको स्थिति सकेजति दयनीय बनाउन खोजिरहेको चोम्स्कीको आरोप छ । यसका साथै उनी आफ्नो प्राइमरी चुनावमा उम्मेदवारको सम्पत्ति, कर्पोरेट शक्ति र आफ्नो फाइदा बढाउन चाहेको चोम्स्कीको आरोप छ ।
प्रो. चोम्स्कीले राष्ट्रपति ट्रम्पले आफ्नो जिम्मेवारी सही ढंगले निर्वाह नगरेको बताए । उनले राज्यका गभर्नरहरुलाई कोरोनासँग लड्ने जिम्मेवारी लिन बाध्य भएको चोम्स्कीको आरोप छ । यो ट्रम्पको धेरै मानिस मराउने र आफ्नो चुनावी राजनीति सुधार्ने रणनीति भएको उनको तर्क छ ।
ट्रम्पले विश्व स्वास्थ्य संगठनको फण्डिङ रोक्दा यमन र अफ्रिकी महाद्वीपमा मृत्यू बढ्ने चोम्स्कीको बुझाई छ ।
चोम्स्की एक अमेरिकी दार्शनिक तथा भाषा विज्ञानका ज्ञाता हुन् । उनी इतिहासकार, सामाजिक समालोचक र राजनीतिक कार्यकर्ताका रुपमा पनि चिनिन्छन् । उनलाई आधुनिक भाषा विज्ञानका पिता पनि भनेर चिनिन्छ । उनले संज्ञानात्मक विज्ञानको क्षेत्रमा पनि काम गरेका छन् । उनले १०० भन्दा बढी पुस्तकहरु लेखिसकेका छन् ।एजेन्सी
उज्यालो प्रतिनिधि
बुद्ध लोप्चन