उज्यालो प्रतिनिधि
काभ्रेपलाञ्चोक । स्थानीय स्वास्थ्य चौकीमा भर्ना भएको २४ घण्टासम्म पनि बच्चा जन्माउन नसकेपछि काभ्रेपलाञ्चोक जिल्लाको डाँडापारिस्थित खानीखोला गाउँपालिकाबाट गर्भवती महिलाको राष्ट्रपति महिला उत्थान कार्यक्रम अन्तर्गत् हेलिकप्टरमार्फत् उद्धार भएको छ ।
शनिबार बिहान १० बजे खानीखोला गाउँपालिकाको केन्द्रमा रहेको ताल्ढुंगा स्वास्थ्य चौकीमा भर्ना भएकी १९ वर्षीया गर्भवती महिला आयुष्मा भ्लोनको अवस्था झन् जटिल बन्दै गएसँगै उनको हेलिकप्टरमार्फत आइतबार उद्धार गरिएको हो ।
खानीखोला गाउँपालिकाका अध्यक्ष इन्द्रबहादुर थिङ ‘छिन्ताङ’का अनुसार गाउँपालिकाका गर्भवतीको अवस्था झन् गम्भीर हुँदै गएपछि सम्बन्धित स्वास्थ्य संस्थाको सिफारिसमो बिरामीको उद्धार भएको हो । सिफारिस अनुसार गर्भवतीको उद्धार गरी काठमाडौंको थापाथली स्थित परोपकार प्रसूति तथा स्त्रीरोग अस्पताल पठाइएको गाउँपालिकाका अध्यक्ष थिङले बताए ।
ताल्ढुंगा स्वास्थ्य चौकीका अनमी रञ्जु कोइरालाका अनुसार गर्भवती महिलाको स्वास्थ्य अवस्था बिग्रँदै गएका कारण हेलिकप्टरबाट उद्धार गर्नका लागि सिफारिस गरिएको थियो ।
डाँडापारी क्षेत्रमा कच्चीसडक सञ्जाल मात्रै भएको र अहिले वर्षातको कारण बाटो अवरुद्ध भएर सवारी साधनसमेत चल्न नसकेकाले हेलिकप्टरमार्फत उद्धार गर्नु परेको अध्यक्ष थिङको भनाइ छ ।
खानीखोलामा एक साताअघि मात्रै राष्ट्रपति महिला उत्थान कार्यक्रम लागू भएको थियो । कार्यक्रम लागू भएपछि ज्यान जोखिममा रहेको गर्भवती महिलाको हेलिकप्टरमार्फत् उद्धार भएसँगै स्थानीयले महिला, बालबालिका तथा ज्येष्ठ नागरिकमन्त्री नवल किशोर साह सुडीलाई धन्यवाद ज्ञापन गरेका छन् ।
बुद्ध लोप्चन