उदयपुर । उदयपुरको रौतामाई गाउँपालिका वडा नं-४ अन्तर्गतको भाते-निगाले-रुवाला सडकखण्डको (झिल्केपाखा) पाखाल्नी भन्ने स्थानमा मर्मतको बिकल्प हुँदाहुँदै मनोमानी ढंगले जथाभाबी बिना मापदण्ड बाटो खन्ने र डिभिजन वन कार्यालयको अनुमति बिना सयौँ सल्ला र सालको रुखहरु ढाल्ने काम भईरहेको छ ।

रौतामाई गाउपालिकाको बजेट रहेको उक्त सडकखण्डमा सडक मर्मतको पर्याप्त विकल्प हुँदाहुँदै सल्ला र सालको रुखहरु ढालेर व्यापार गर्ने उदेश्यले भगवती सामुदायिक बन अन्तर्गत पर्ने उक्त सडकखण्डमा डिभिजन बन कार्यालय त्रिबेणी कटारीको अनुमति र स्वीकृति बिना नै सडक बिस्तारको बहानामा सयौं रुखहरु जथाभाबी ढालीरहेको जानकारी स्थानियहरुले डिभिजन बन कार्यालय कटारीलाई गराएपछि तत्कालै कर्मचारीहरु उक्त ठाउँमा खटाएको जानकारी सहायक वन अधिकृत भोबिन्द्र मण्डलले जानकारी दिए ।

पहिरोको उच्च जोखिम रहेको उक्त ठाउँमा जथाभाबी सडक खनेर झनै जोखिम निम्त्याएको भन्दै स्थानीयहरु आक्रोसित बनेका हुन् । डिभिजन बन कार्यालयको अनुमतिबिनै सयौंको संख्यामा रुखहरु काटिनु खेदजनक रहेको स्थानियहरुको भनाई छ ।