काठमाडौं । एमाले प्रवेश गरेका माओवादीहरु अलपत्र पर्ने डरमा परेका छन् । नेकपा एमालेका अध्यक्ष खड्गप्रसाद ओली र वरिष्ठ नेता माधवकुमार नेपाल समुहबीच कार्यदलस्तरमा १० बुँदे सहमति भएसँगै माओवादीबाट एमाले प्रवेश गरेकाहरु अलपत्र पर्ने डरमा परेका हुन् ।

प्राप्त सुचनाअनुसार सोमबार बिहान ११ बजेको समयमा पूर्वमाओवादी नेता टोपबहादुर रायमाझीको पहलकदमीमा एमाले प्रवेश गरेका नेताहरुबीच अनौपचारिक छलफल भएको थियो । छलफलमा उनीहरुले आफूहरुको राजनीतिक जीवन अलपत्र पर्ने सक्ने निष्कर्ष निकालेका हुन् ।

बैठकपछि एकजनाले उज्यालो नेटवर्कसँग भने, ‘खासमा हामी एमाले हुनका लागि ओलीसँग लागेका होइनौँ, हामी एमाले माओवादी मिलेर बनेको नेकपाको निरन्तरताका लागि ओलीसँग लागेका हौँ, अहिले हामीलाई एमालेमाथि एमाले बनाउन खोजियो ।’

उनले थपे, ‘हामी नेकपाकै निरन्तरता चाहन्छौँ, तर ओलीजी उही एमाले बनाउनेमा लाग्नुभयो, माधव नेपाल समुहसँगको १० बुँदे सहमति त्यसैको निरन्तरता हो ।’

बैठकमा रामबहादुर थापाले पनि पछिल्लोपटक ओलीसँग भएको छलफलबारे संक्षिप्तमा बोलेका थिए । ‘पहिले चाहिँ हामी भएपछि सबै पुग्यो भन्नेखाले ओलीजीको बुझाई थियो, अहिले हाम्रो टोलीलाई खासै वास्ता गर्नुभएको छैन’ रामबहादुरको भनाई उदृत गर्दै ती नेताले भने ।

अनौपचारिक छलफलले एमालेलाई नेकपामा रुपान्तरणका लागि ओलीसँग वार्ता र संघर्ष जारी राख्ने निष्कर्ष पनि निकालेको छ । छलपलबारे टोपबहादुरले उज्यालो नेटवर्कसँग भने, ‘अनौपचारिक छलफल त भइरहन्छ, त्यस्तो खास छलफल केह भएको छैन ।’