काठमाडौं । नेकपा माओवादी केन्द्रका केन्द्रीय सदस्य युवराज चौलागाईले एमालेमा हालै प्रवेश गरेका नेता टोपबहादुर रायमाझीको बकबास धेरै भएको टिप्पणी गरेका छन् ।

पछिल्लो समय नेकपा माओवादी केन्द्र अवैधानिक भएको बताउँदै टोपबहादुर लगायत एमाले प्रवेश गरेका माओवादीहरु माओवादी पार्टी खारेज गर्नुपर्ने अडानमा छन् ।

सोही विषयमा सामाजिक सञ्जालमा स्टाटस लेख्दै चौलागाईले एमाले मिल्दै गर्दा घरको न घाटको हुने भयले निस्केका असन्तुलित बिचारहरुले टोपबहादुरको स्तरहीनता बाहेक केही पुस्टी नगर्ने दावी गरेका छन् ।

उनले थपेका छन्, ‘माओवादीले २०६९ फागुनमा छैठौं महाधिवेशन गरेको थियो, २०७० असोजमा मा राष्ट्रीय सम्मेलन गरेको थियो ( त्यहॉ बाट सचिवमा निर्वाचित भइ फर्किएर पेरिसडांडा र सिंहदरबारमा राज गरुन्जेल तपाईलाई गजब चैन थियो । आज एमालेबाट पनि असुरक्षित भए पछि, असंवैधानिक मन्त्री पद खुस्केर चर्चाहीन भए पछि मालिक रिझाउन र फोस्रो चर्चा पाउन तपाईंले गरेको बेचैन तिकडम अश्लील र पकपीडक छ । तर तपाईंले बुझ्न नसकेको कुरा के छ भने यसबाट माओवादीलाई घाटा हुंदैनस बरु तपाई जस्ता ग़द्दारहरु बिरुद्ध थप इख सहित एकीकृत हुन यसले प्रेरित गर्छ । चिन्तनहीन र परजीवि सोचर शैलीका तपाईहरुका राजनीति यसरी सकियो कि सपना बेचेर थुपारेका आलिशान महलमा कुकुरसंग खेलेर बस्ने हैसियत बाहेक तपाईंका टाट पल्टेका दोस्तहरुसंग अरु केही बाँकी छैन ।’