एजेन्सी । उत्तर र दक्षिण कोरियाली सीमामा आइतबार बिहान गोलीबारी भयो । यससँगै दुई देशबीच तनाव बढेको छ । दक्षिण कोरियाको समाचार एजेन्सी योनहापका अनुसार उत्तर कोरियाले गोलीबारीको सुरुवात गरेपछि दक्षिण कोरियाले पनि जवाफी फायरिङ गरेको हो ।

तीन वर्ष अघि पनि उत्तर कोरियाले यस्तै प्रकारको गोलीबारी गरेको थियो । त्यतिबेला पनि दुई देशबीच थुप्रै दिनसम्म तनाव चलेको थियो ।

क्षतीको खबर छैनः

मिडिया रिपोर्ट अनुसार गोलीबारीमा दुबै तर्फ कुनै पनि क्षती भएको छैन । उत्तर कोरियाले दक्षिण कोरियाको चियोरवान शहरलाई निशाना बनाउने कोसिस गर्यो । यो शहर सीमाभन्दा निकै नजिक छ । त्यसको केही मिनेट पछि नै दक्षिण कोरियाले जवाफी कारवाही गर्यो ।

दुई देशबीच कुराकानीः

घटनापछि दक्षिण कोरियाको जोइन्ट चीफ अफ स्टाफले बयान जारी गर्दै भन्यो, ‘हामी इन्टर कोरियन कम्युनिकेशनमार्फत् कुराकानी गरिरहेका छौं । यसमार्फत् तनाव कम गर्नमा मद्दत पाइन्छ । हाम्रो सेना कुनै पनि हमलाको जवाफ दिनका लागि तयार छ ।’

असैन्य क्षेत्रः

उत्तर र दक्षिण कोरियाको ११५ किलोमिटर लामो सीमामा सन् १९५३ मा एक असैन्य क्षेत्र बनाइयो । यहाँ एक कोरिडोर छ । तनावको स्थितीमा दुई देशका सैनिक अधिकारी यहाँ कुराकानी गर्छन् । सन् २०१७ मा उत्तर कोरियाको एक सैनिकले जीपबाट हाम फालेर दक्षिण कोरियाली सीमामा जाने कोसिस गरेको थियो । भाग्ने क्रममा साथीले यी सैनिकमाथि गोली चलाए । पछि दक्षिण कोरियाली सैनिकले उनलाई बचाए । अस्पतालमा भर्ना गराए । उनी स्वस्थ छन् र अहिले पनि दक्षिण कोरियामा बसिरहेका छन् ।