रोल्पा, चैत २१ – सुनिलस्मृति गाउँपालिका–४ सुलिचौर बजारमा आज इलाका प्रहरी कार्यालय सुलिचौरको आयोजनामा नागरिक सुनुवाइ कार्यक्रम भव्य रूपमा सम्पन्न भएको छ।

समुदाय–प्रहरी साझेदारी कार्यक्रम अन्तर्गत आयोजना गरिएको उक्त कार्यक्रम इलाका प्रहरी कार्यालय सुलिचौरका इञ्चार्ज प्रहरी निरीक्षक अरुण तामाङको नेतृत्वमा सम्पन्न भएको हो। कार्यक्रममा विभिन्न राजनीतिक दलका प्रतिनिधिहरू, उद्योग वाणिज्य संघ, होटल व्यवसायी संघ, पूर्व प्रहरी, व्यापारी, समाजसेवी, शिक्षक, बुद्धिजीवी तथा पत्रकारहरूको उल्लेखनीय उपस्थिति रहेको थियो।

कार्यक्रममा सहभागीहरूले नेपाल प्रहरीले सञ्चालन गरिरहेका कार्य र गतिविधिबारे खुलेर सुझाव तथा सल्लाह प्रस्तुत गरेका थिए। उनीहरूले सुरक्षा प्रणालीलाई अझ प्रभावकारी बनाउने उपायहरूबारे रचनात्मक छलफल गरेका थिए।

प्रहरी निरीक्षक तामाङले सुरक्षालाई थप सुदृढ बनाउन वैशाख महिनादेखि गाउँपालिका भित्रका बस्तीहरूमा ‘छड्के जाँच (सर्च अपरेसन)’ सञ्चालन गरिने जानकारी दिए।

कार्यक्रम मर्यादित र सौहार्दपूर्ण वातावरणमा सम्पन्न भएको सहभागीहरूले बताए। कार्यक्रममा देखाएको सक्रियता, स्पष्ट दृष्टिकोण र समन्वयात्मक भूमिकाका लागि इञ्चार्ज तामाङलाई विशेष धन्यवाद समेत व्यक्त गरिएको छ।