एजेन्सी । कोरोना भाईरसको महामारीका कारण एक बर्षपछि सारिएको टोकियो ओलम्पिक गेम्समा सहभागी पुरुष फुटबल खेलाडीको उमेर पनि एक वर्ष बढाइने भएको छ । अब २४ वर्षसम्मका खेलाडीले टोकियो ओलम्पिक खेल्न पाउनेछन् । यसअघि ओलम्पिकमा सहभागी हुने खेलाडीको उमेर २३ वर्षमुनिको हुनुपर्दथ्यो ।

अन्तर्रािष्ट्र«य ओलम्पिक कमिटि (आईओसी) ले ओलम्पिक सरेपछि खेलाडीको उमेर हदमा पनि परिवर्तन गर्न लागेको हो । ओलम्पिकमा महिला फुटबलको उमेरमा भने कुनै नियम छैन । महिला फुटबलमा सिनियर टीमले नै प्रतिस्पर्धा गर्दै आएका छन् ।

आईओसीले विश्व फटबल महासंघ (फिफा) सँग समन्वय गरी पुरुष खेलाडीको उमेर एक वर्ष बढाउन लागेको हो । फिफाले सन् १९९७ जनवरी १ तारिखसम्म जन्मिएका खेलाडीलाई ओलम्पिकमा समावेश गर्ने तयारी गरेको छ ।

यसअघि आगामी जुलाई २४ देखि अगस्ट ९ तारिखसम्म गरिन लागिएको ओलम्पिक कोरोना भाइरसका कारण एक वर्षपछि सरेको हो । नयाँ तालिका अनुसार टोकियो ओलम्पिक सन् २०२१ को जुलाई २३ देखि अगस्ट ८ तारिखसम्म हुनेछ ।