ङा याम्बुरि टिसि डाेबाला मुबा । दत्ते कक्षा 5 रि डाेसि खाबानकेन मुला । ङाला मीन अनुभव मोक्तान लामा हिन्ना । तिनी न्हाङगर नाम्दुङ ला नाेन हिन्ना चु ला । कक्षा 5 ला अन्तिम परीक्षा तासि जिन्बा मुला । याम्बुला डाेबा ताङदा थेन ताबा दुइरि परीक्षा लिच्छा तिलाई रेला छुटिरि नाम्सारि निबा सेम लाजि । आमा थेन ङा नाम्सारि निबा ताजि । परीक्षा जिन्बाला रेनिदासि आमा थेन ङा नाम्सारि थाेन्जि। थे दुइरि अस्याङला काेला निमा याेन्जन लामानाेन छ्याम ताजि नाम्सारि निबारि । निमानाेन याम्बुरि कक्षा 9 रि डाेबान मुबा । निमानाेन ङाला नाम्सारि ङान्थेन छ्याम निजि । ङाला नाम्साला मीन गाङनाम्सा हिन्ना । जकि गाङरि ताबासे गाङनाम्सा बिबा हिन्ना । नाम्सारि तिनि न्हाङगर साेङसाेङ खर्बा मुबा । पिङ बिबा ग्रेन – ग्रेन दाेङ चेख्खेन मुबा । क्युइ युबा ह्वारारि चे पिङ्गै म्राङ्बा मुबा । 4 दिन लिच्छा अस्याङला दिमरि ङा, निमा ओम आमानाेन निजि । अस्याङला दिम शिखरपुररि मुबा । ङाला दिम बिमा अस्याङला दिम जकि ल्हारि मुबा । गाडिरि क्रेसी अस्याङला नाम्सा दाेना दाेजि । आमासे बेनान ग्ला कादेला मिनकादे सुङबान निजि । निमाला दिम अथवा अस्याङला दिमरि दाेमा अस्याङ,आङि, आखे,माम मुबा । आखेसे अनुभव खजिम खाउ-खाउ चुरि बिवान मुबा । ङा आखेला ङामरि निजि । आखेसे थाेबाेरि स्याेमबान ताम लाजि । आमासे ङादा अस्याङदा ल्हास्साे लाउ पाङ्जि । ङाइ अस्याङ , आङि,आखे,मामदा ल्हास्साे लाजि । आमासे बेनानदा फ्या लाजि ।
आमादा ङाइ ताम ङ्याेइजि । आमा एसे तिल्दा फ्या लाबा ? आमासे पाङजि । ह्याङ बिमा ग्रेनदा फ्या लादाेला । चु ह्याङला सस्कार हिन्न । याम्बुरि टिसै खलाङमन्दान टिसै म्लेबारि आता सुङजि । थेरङ हिन्साम ङैनाेन फ्या लाबारि ताला ? आमासे ताला फ्या लाउ ह्राङ विमा ग्रेन्से माेलाम पिन्ना ह्याङदा पाङजि । ङै फ्या लाजि । आखे मामला सेम ताङबान म्हेन्दाेला काेला कादे ज्यबा टिम बिबा ताम लाबा मुबा । याम्बुरि टिसै फ्या लासेबा टिम बिसि मामला सेम ताङबा मुबा ।आमाला मीन म्हेन्दाे पाङबा मुबाला टिम । ह्राङ्ला आमा ग्याेइनाेन सेबा / गाेबा टिम पाङजि । याम्बुरि टिबा म्हिला काेला कादेदा तामाङ ताम असेबा ताम आखे मामसे खाल लासि टिबा मुबा । आमासे पाङजि म्हिकादे याम्बुरि टिमा ह्यान्दे तामाङ ग्याेइ अापाङबा मुला । तिलासि सेसे ग्याेइ । थेतासि ङाइमि सत्तान पाङबा लाबा । थेसे लमा ङाला काेल्से ग्याेइ सेबा ताम लाजि । थे दुइरि ताेर्सेला दिमला ङ ते थेबा जतुकु ङानि म्राङ्सी अस्याङला दिमरि खाजि । आमासे ताेर्से दिमला जच्चा अस्याङला काेला पेङदाेर्जे बिसि सेना लाजि । पेङ दाेर्जेसे ल्हास्साे लाजि ।
ङाइएनाेन ल्हास्साे लाजि । थे लिच्छा पेङदाेर्जे थेन ङा ह्रो ताजि । छ्यामनाेन माङग्यारि मार क्लाङजि । ङै यामबुला डाेबाला ताम,क्लाङबाला ताम ,ह्रोकदेला ताम लाजी । पेङदाेर्जेसे नाम्साला डाेमा ह्यान्देला ह्रो दोना ओेम संस्कारदाेनाला ताम लाजि । याम्बु थेन नाम्साला ब्रीबा डाेबा जकि फरक ताबा म्हान्जि । छिननाङ ताम लासि पेङदाेर्जे दिम निजि । अनुभव दाेसि दिमरि आमा मुबा ग्लारि खजि । पेङदाेर्जेला अानिबानि बेनान सेम निजि । बेनान ताम ङ्याेइला म्हान्जि । आमा ! पेङदाेर्जे बिबा तिला ? तिल्दा थे मीन थान्जि , खल्से थान्जि ? बिसि ङ्याेइजि । आमासे पाङजि पेङदाेर्जे बिबा पहिलाे ह्याङला डम्फु स्हेङबा म्हि हिन्न । डम्फु बिबा ह्याङला ङेसेबा हिन्ना पाङजि । क्रा टाेलला आखे सांजिसे थान्बाराे मीन पाङजि । पेङदाेर्जेसे पाङबा ताम आेम मीन थेमा अस्याङला नाम्साला सस्कार- संस्कृति म्राङ्सी ङादा आैदिन नाम्सारि डाेबारि म्याङसाम तासेला ह्राङ ताजी । ओेते चेख्खेन आताना अनुभव नाेन पेङदाेर्जे दाेबा ल्हानान सेम ताजि । लेखक एंव साहित्यकार कविराज तामाङ काभ्रे ।।।