उज्यालो प्रतिनिधि
दाङ, २९ जेठः तुलसीपुर उपमहानगरपालिकाले आगलागीको घटनामा परी ज्यान गुमाएका दुई जनाका परिवारलाई विपद् राहत कोषबाट जनही रु दुई लाख राहत उपलब्ध गराउने निर्णय भएको छ ।
उपमहानगरपालिकाकोे ४८औँ कार्यपालिका बैठकले अग्निपीडित परिवारलाई उक्त रकम प्रदान गर्ने निर्णय गरेको प्रमुख प्रशासकीय अधिकृत केशवराज पार्धेले जानकारी दिनुभयो ।
गत पुस २८ गते आगलागीमा परी ज्यान गुमाएकी तुलसीपुर–१ भमके निवासी ७६ वर्षीया रिमा देवकोटाको परिवार र गत चैत १२ गते आगलागी घटनामा परी ज्यान गुमाएकी तुलसीपुर–७ मोतीपुर निवासी ७२ वर्षीया गुमीकुमारी पौडेलको परिवारलाई जनही रु दुई लाख राहत उपलब्ध गराउने निर्णय भएको हो ।
नगर प्रमुख टीकाराम खड्काको अध्यक्षतामा बिहीबार बसेको बैठकले सो निर्णय गरेको उपमहानगरपालिकाले जनाएको छ ।
बैठकले केही समयअघि परेको असिनापानीका कारण उपमहानगरपालिका क्षेत्रभित्र तरकारीखेतीमा क्षति बेहोरेका किसानलाई राहत प्रदान गर्ने निर्णय गरेको छ ।
यसैबीच, तुलसीपुर उपमहानगरपालिकामा दमकल (बारुण यन्त्र) नहुँदा समस्या हुने गरेको छ । पालिकामा रहेको दमकल ‘जेनजी’ आन्दोलनका क्रममा क्षति पुगेको थियो ।
बढ्दो गर्मीसँगै उपमहानगरपालिकामा आगलागीका घटना बढिरहेका छन् । केही समयअघि तुलसीपुरका दोघरेस्थित पार्किङ क्षेत्रमा राखिएको बसमा आगलागी हुँदा ठूलो क्षति बेहोर्नु परेको थियो ।
बुद्ध लोप्चन