उज्यालो प्रतिनिधि
भक्तपुर : काठमाडौँ उपत्यकाका विभिन्न सुकुमवासी बस्तीबाट विस्थापित भएकाहरूलाई भक्तपुरका दुई ‘सेल्टर’ मा आश्रय दिइएको छ।
भक्तपुरको खरिपाटीस्थित चाँगुनारायण नगरपालिकामा रहेको नेपाल विद्युत् प्राधिकरणको तालिम केन्द्र र मध्यपुरथिमि नगरपालिकास्थित कृषि विकास तालिम केन्द्रको भवनमा सेल्टरका रूपमा अस्थायी बासस्थानको व्यवस्था गरिएको जिल्ला प्रशासन कार्यालयका प्रमुख जिल्ला अधिकारी उमेशकुमार ढकालले जानकारी दिए।
यहाँ ल्याइएका सुकुमवासीलाई खाने र बस्ने नि:शुल्क व्यवस्था गरिएको छ। खरिपाटीस्थित तालिम केन्द्रमा १४० जना सुकुमवासीलाई राखिएको छ भने उनीहरूलाई होस्टेलमा परिवार–परिवार छुट्ट्याएर फरक कोठामा राखिएको छ।
यसअघि कोरोना भाइरसको महामारीमा पहिलो पटक चीनबाट ल्याइएका नेपाली विद्यार्थीलाई सोही स्थानमा ४५ दिनसम्म राखिएको थियो। त्यसपछि कोरोना सङ्क्रमितलाई पनि राखिएको यस केन्द्रमा २५० जना अट्ने क्षमता रहेको केन्द्रले जानकारी दिएको छ।
टेकु सुकुमवासी बस्तीबाट सरकारले आफूहरूलाई गाडीमा राखेर यहाँ पुर्याएको बताउँदै केही सुकुमवासीले तत्कालका लागि भए पनि खानबस्न पाइरहेको बताए। यहाँ राखिएका सुकुमवासीहरूको अवस्था बुझ्नका लागि प्रधानमन्त्री कार्यालयअन्तर्गतको सचिवालयको एउटा टोली आइतबार यहाँ आएको थियो।
त्यसैगरी, सरकारले ३९ जना सुकुमवासीलाई मध्यपुरथिमिको सिन्टिटारस्थित कृषि विकास बैङ्कको तालिम केन्द्रमा राखेको छ। उनीहरूको पनि आवास र खानाको व्यवस्था गरिएको छ।
दुवै सेल्टरमा रहेका सुकुमवासीका लागि वाग्मती प्रदेश सरकारका स्वास्थ्यमन्त्री किरण थापामगर र स्वास्थ्य सचिव डा. सुमित्रा गौतमले तत्काल स्वास्थ्य सेवा पुर्याउन निर्देशन दिएका छन्।
जिल्ला जनस्वास्थ्य कार्यालयकी प्रमुख अञ्जना खड्काले आइतबार सरकारले सुकुमवासी राखेको मध्यपुरथिमि र चाँगुनारायणको दुवै सेल्टरमा भक्तपुर अस्पतालको चिकित्सकसहितको टोलीले सामान्य स्वास्थ्य परीक्षण गरेको र आज दुवै सेल्टरमा स्वास्थ्य शिविर, औषधि वितरण र मनोपरामर्श सेवा उपलब्ध गराउने जानकारी दिइन्।
उज्यालो प्रतिनिधि
बुद्ध लोप्चन