लक्ष्मण भट्ट, चितवन । चितवनमा असार ३ गते राति १२ बजेसम्म निषेधाज्ञा थप गर्ने निर्णय भएको छ । जिल्ला कोभिड–१९ संकट व्यवस्थापन केन्द्र (डीसीसीएमसी) ले निषेधाज्ञा थप्न सिफारिस गरेपछि जिल्ला प्रशासन कार्यालय चितवनले निषेधाज्ञा थप गर्ने निर्णय गरेको हो । चौथो पटक थप गरिएको निषेधाज्ञाको अवधि भोलि रातिबाट सकिदैछ ।

जिल्ला प्रशासन कार्यालय चितवनले गत वैशाख १६ गतेरातिदेखि लागू हुने गरी वैशाख मसान्तसम्म निषेधाज्ञा जारी गरेको थियो । लगत्तै जेठ १३ गते राती १२ बजेसम्म लागू हुने गरी निषेधाज्ञा लम्ब्याइएको थियो । कोरोना संक्रमणको दर अझै नघटेपछि जेठ २० गते राति १२ बजेसम्म लागू हुने गरी थप गरिएको थियो । बैक तथा वित्तीय संस्था खुल्न दिएर जेठ २७ गते राति १२ बजेसम्मलाई थप गरेको थियो ।

भर्खरै जारी अध्यादेश अनुसार यस पटकको निषेधाज्ञालाई केहि खुकुलो पारिएको छ ।
बढिमा ३ जना सम्म कामदार रहने गरी सवारी साधनको मर्मत गर्ने वर्कशप सञ्चालन गर्न पाईने छ । उद्योग/कलकारखानाको हकमा कर्मचारी तथा कामदारलाई कार्यस्थलमै खाने/बस्ने व्यवस्था गरी सञ्चालन गर्ने । सो संभव नभएमा उद्योगको सवारी साधनले नै घर सम्म लाने / ल्याउने व्यवस्था गर्ने तथा नेपाल सरकारले तोकेका जनस्वास्थ्य तथा सुरक्षाका मापदण्डको अनिवार्य पालना सुनिश्चितता गरेर मात्र सञ्चालन गर्न पाईनेछ ।