पोखरा । स्याङ्जामा एम्बुलेन्स दुर्घटना हुँदा २ जनाको ज्यान गएको छ । आइतबार विहान स्याङ्जाको वालिङबाट चापाकोट जाँदै गरेको बा २ झ ४०११ नम्बरको एम्बुलेन्स वालिङ नगरपालिका-५ को मजकोटमा दुर्घटना हुँदा २ पुरुषको मृत्यु भएको हो ।
मृत्यु हुनेमा चापाकोट नगरपालिका-९ का ३५ वर्षीय भानुभक्त गैह्रे र चापाकोट-१० का २५ वर्षका श्याम पंगेनी छन् । दुर्घटनामा चापाकोट नगरपालिका-९ का ३१ वर्षीय एम्बुलेन्स चालक सुरेन्द्र भण्डारी, २८ वर्षीय पवित्रा पोखरेल घाइते भएको जिल्ला प्रहरी कार्यालय स्याङ्जाका प्रवक्ता प्रहरी नायब उपरिक्षक राजेन्द्र अधिकारीले जानकारी दिए ।
दुर्घटनामा घाइते भएका दुवैलाई प्राथामिक स्वास्थ्य केन्द्र वालिङमा उपचार पश्चात थप उपचारको मनिपाल शिक्षण अस्पताल लगिएको डिएसपी अधिकारीले बताए ।
काठमाडौंमा बिरामी छोडेर फर्केको एम्बुलेन्स सडकबाट अन्दाजी २५० मिटर तल खसेको बताइएको छ ।