एमसीसीमा प्रचण्ड बटमलाइन : राष्ट्रघाती बुँदा संशोधन पहिलो शर्त, नभए फिर्ता

१३ असार २०७७, शनिबार १०:०३ मा प्रकाशित

काठमाडौं । मिलिनियम च्यालेन्ज कर्पोरेशन (एमसीसी) को सन्दर्भमा नेकपाका कार्यकारी अध्यक्ष पुष्पकमल दाहाल प्रचण्डले दुईवटा बटमलाइन अघि सारेका छन् ।

नेकपाको जारी स्थायी समिति बैठकमा एमसीसी पनि एजेण्डाको रुपमा कार्यसुचीमा छ । यही सन्दर्भमा नेकपा स्थायी समिति सदस्यहरुले धारणा राख्ने क्रम जारी छ ।

तर, प्रधानमन्त्री एवं पार्टी अध्यक्ष केपी शर्मा ओली र कार्यकारी अध्यक्ष प्रचण्डको यो विषयमा फरकफरक मत छ । ओलीले एमसीसी पास हुनुपर्ने बताउँदै आएका छन् ।

यही फरक मतकै बीचमा प्रचण्डले एमसीसीको सन्दर्भमा दुईवटा बटमलाइन अघि सारेका छन् । यसमा प्रधानमन्त्री अनिच्छुक देखिएसँगै बैठकमा अनुपस्थित भएको विशेष स्रोतको भनाई छ ।

ओलीनिकट स्रोतका अनुसार प्रचण्डले एमसीसीमा रहेका राष्ट्रघाती बुँदा संशोधन हुनुपर्ने पहिलो शर्त राखेका छन् । ओलीसँगको भेटमा उनले एमसीसीमा उल्लेख भएका राष्ट्रिय स्वाधीनता र नेपालको संविधानसँग बाँझिएका केही विषयवस्तु अनिवार्य रुपमा संशोधन हुनुपर्ने बताएका छन् ।

तर, प्रधानमन्त्रीले भने एमसीसीमा वास्तविकताभन्दा बढी आशंकाले काम गरेको भन्दै हुबहु पास गर्नुपर्ने बताउँदै आएका छन् ।

त्यसैगरी संशोधनसहित पास गर्न अमेरिका अनिच्छुक देखिएको खण्डमा एमसीसी नै फिर्ता गर्नुपर्ने प्रचण्डको बटमलाइन छ । जारी स्थायी समिति बैठकबाट पनि यही ढंगबाट निर्णयमा पुग्नुपर्ने प्रचण्डको अडान छ ।

एमसीसीकै विषयमा नेकपा स्थायी समिति सदस्य लिलामणि पोखरेल भन्छन्, ‘एमसीसी खारेज हुन्छ, यही बैठकबाट निर्णय हुन्छ ।’

तर, अध्यक्ष प्रचण्ड खारेजभन्दा पनि संशोधनको पक्षमा छन् । प्रचण्डले संशोधनसहित पास गर्न अमेरिकासँग सल्लाह गर्नुपर्ने बताउँदै आएका छन् ।

अल न्युज नेट्वर्कद्वारा सञ्चालित उज्यालो नेट्वर्क डटकम नेपाली, अंग्रेजी संस्करणका साथै अनलाइन टिभी पनि सञ्चालित छ । हामीसँग फेसबुकट्वीटर मार्फत पनि जोडिन सक्नुहुनेछ ।

सामाजिक संजालवाट साभार