काठमाडौं । भूमिसुधार तथा मालपोत कार्यालय डिल्लीबजारका ६ जना कर्मचारी ८ लाख ५० हजार घुससहित पक्राउ परेका छन् ।
अख्तियार दुरुपयोग अनुसन्धान आयोगका विशेष टोलीले उनीहरुलाई घुस लिँदालिँदै पक्राउ गरेका हुन् । पक्राउ हुनेहरुमा मालपोत कार्यालयका शाखा अधिकृत रघुवंश कँडेल, नासु नवराज घिमिरे, नासु नारायण प्रसाद पोखरेल, नासु उद्धव प्रसाद सापकोटा, खरिदार दिपक खनाल, नासु गोपाल खड्का छन् ।
पक्राउ परेका कर्मचारीहरुले काठमाडौंका एक जग्गा धनीसँग कित्ताकाटका लागि घुस मागेका थिए ।
काठमाडौंका एकजना जग्गा धनीले जग्गा बिक्रीका लागि कित्ताकाट गर्न खोजेका थिए । सबै जग्गालाई २४ कित्तामा विभाजन गर्ने ती व्यक्तिको तयारी थियो ।
यही योजनाका साथ उनी डिल्लीबजार पुगे । डिल्लीबजार पुग्दा कर्मचारीले उनीसँग पैसाको ‘डिल’ गर्न खोजे । अख्तियारको फन्दामा परेका ६ जनाको समुहले सुरुमा ती व्यक्तिसँग प्रतिकित्ता २ लाख रुपियाँ मागे ।
२४ कित्तामा जग्गा विभाजन गरे बापत् उनीसँग ती कर्मचारीको समुहले ४८ लाख मागे ।
यो पनि पढ्नुस्, : अख्तियारको फन्दामा परेका ६ कर्मचारी, जसले जग्गा कित्ताकाट गर्न ४८ लाख मागेका थिए