बाँके  ।  बाँकेमा शनिवार २७ जना कोरोना संक्रमित थपिएका छन् । देशभर ३६ जना नयाँ संक्रमित भेटिएकोमा बाँकेका २७ जनामा कोरोना पुष्टि भएको हो ।

नरैनापुर गाउँपालिका–१, स्थित मदरसाका ६ जनामा कोरोना देखिएको छ । सोही गाउँपालिका–३, स्थित विद्यालय क्वारेन्टाइनमा रहेका १५ जना र वडा नं. १ स्थित विद्यालयमा रहेको क्वारेन्टाइनका ६ जनामा कोरोना संक्रमण पुष्टि भएको हो । 

यो सँगै नरैनापुरमा कोरोना संक्रमितको संख्या १ सय १४ पुगेको छ । बाँकेमा संक्रमितको संख्या एक सय ४२ पुगेको छ । बाँकेमा शुक्रवार १४ जना कोरोना संक्रमित फेला परेकोमा १३ जना नरैनापुरका छन् ।

संक्रमितलाई लिन गएको स्वास्थ्यकर्मी र सुरक्षाकर्मीको टोलीलाई स्थानीयले अवरुद्ध गरेपछि १२ जना संक्रमित क्वारेन्टाइनबाट भागेका थिए । भागेका मध्ये ११ जनालाई तत्कालै नियन्त्रणमा लिएर रातको १२ बजे नेपालगन्ज ल्याइएको थियो । भने एक जनालाई भारत छिर्ने प्रयास गर्दा नेपाल–भारत सीमा नाकाबाट नियन्त्रणमा लिएर नेपालगन्ज ल्याइएको छ ।

ती संक्रमितलाई सीमा नाकामा रहेको आँप बगियामा लुकेर बसेको अवस्थामा प्रहरीले फेला पारेको थियो । नेपालमा ५ सय ५ पुरुषर ७९ जना महिलासहित कोरोना संक्रमितको संख्या ५ सय ८४ पुगेको छ ।