उज्यालो प्रतिनिधि
एजेन्सी । इरानमा कोरोना भाइरसका कारण मृत्यु हुनेको संख्या ५० पुगेको छ । इरानको उत्तरी सहर कोममा मात्रै ५० जनाको मृत्यु भएको हो । राजधानी तेहरानबाट १४७ किलोमिटर दक्षिणपश्चिम क्षेत्रमा पर्ने कोम सहरमा गत बुधबारदेखि भाइरसको संक्रमण भेटिएको थियो । सोमबारसम्म १२ जनाको मृत्यु भएको थियो ।
इरानी अधिकारी अहमद अमिराबादी फरहानीले बताए अनुसार कोम सहरमै २५० जना क्वारेन्टाइनमा छन् । कोम सहर इरान तथा अन्य देशका मानिसहरुको धार्मिक अध्ययनको लोकप्रिय गन्तव्य हो । इरानका धेरै विद्यालय तथा अन्य सार्वजनिक स्थानहरु बन्द गरिएको इरानी अधिकारीले जनाएका छन् ।
छिमेकी देशहरु पाकिस्तान, टर्की, अफगानिस्तानलगायतका देशले अस्थायी रुपमा इरानको सीमा बन्द गरेका छन्, र इरानको यात्रामा पनि प्रतिबन्ध लगाएका छन् । कोमलगायत इरानका अन्य चार सहरमा कोरोना भाइरसको संक्रमण फैलिएको अधिकारीहरुले जनाएका छन् ।
उज्यालो प्रतिनिधि
बुद्ध लोप्चन