उज्यालो प्रतिनिधि
एजेन्सी, १२ फाल्गुन । अमेरिकी राष्ट्रपति डोनाल्ड ट्रम्प आफ्नो दुई दिवसीय भ्रमणका क्रममा भारत आइपुगेका छन् ।
सोमबार बिहान राष्ट्रपति ट्रम्प गुजरातको अहमदाबाद विमानस्थलमा ओर्लिएका हुन् । उनलाई भारतीय प्रधानमन्त्री नरेन्द्र मोदीले विमानस्थलमा स्वागत गरेका थिए ।
राष्ट्रपति ट्रम्पले गुजरातस्थित विश्वकै ठूलो नवनिर्मित क्रिकेट मैदानमा सहभागी एक लाखभन्दा मानिसलाई सम्बोधन गरेका छन् । उनले आफ्नो सम्बोधनमा अमेरिकाले भारतलाई सँधै माया गर्ने बताएका थिए । त्यस्तै उनले अमेरिका भारतको बफादार मित्र भएको पनि बताए ।
‘नमस्ते, अमेरिकाले भारतलाई माया गर्छ’, सम्बोधनका क्रममा ट्रम्पले भने, ‘अमेरिका सधैँ भारतको बफादार मित्र हुनेछ ।’
त्यस्तै भारतीय प्रधानमन्त्री मोदीले पनि क्रिकेट मैदानमा सहभागीलाई सम्बोधन गरेका छन् । सम्बोधनका क्रममा मोदीले अमेरिका र भारतबीचको सम्बन्धको प्रशंसा गरेका छन् ।
‘नमस्ते, ट्रम्प । अमेरिका-भारत सम्बन्ध एउटा वृहत र समावेशी साझेदारी पनि हो’, मोदीले भने ।
आफ्नो परिवारसाथ भारत आएका ट्रम्प अहमदाबादपछि दिल्ली र आगरा जानेछन् । उनीसँगै पत्नी मेलानिया ट्रम्प, छोरी इभान्का र ज्वाइँ जरेड कुशनर पनि भारत आएका छन् ।
आतंकवादविरुद्धको लडाइँमा सहकार्य गर्दै आएका भारत र अमेरिकाबीच ट्रम्पको भ्रमणका क्रममा महत्वपूर्ण सम्झौता हुन सक्ने बताइएको छ । अमेरिकाको होमल्याण्ड सेक्युरिटी र भारतको इन्टेलिजेन्स ब्यूरोबीच आतंकवादसम्बन्धी सम्झौता हुने बताइएको छ ।
त्यस्तै दुबै मुलुकबीच रक्षा सम्झौता हुन सक्ने अपेक्षा गरिएको छ । साथै भारत र अमेरिकाबीच इन्डो प्यासिफिक क्षेत्रमा सहयोग बढाउने गरी एक महत्वपूर्ण सम्झौता हुन सक्ने विश्लेषण गरिएको छ ।
उज्यालो प्रतिनिधि
बुद्ध लोप्चन