उज्यालो प्रतिनिधि
नयाँ दिल्ली, १० फागुन । दिल्लीको न्यू अशोक नगरमा छोरीले सहगोत्रीसँग विवाह गरेको भन्दै अभिभावकले छोरीको हत्या गरी घरभन्दा १०० किलोमिटर टाढा शव फालिदएका छन् ।
घटनामा संलग्न भएको भन्दै बाबुआमासहित ६ जनालाई प्रहरीले पक्राउ गरेर अनुसन्धान सुरु गरेको छ ।
शीतल चौधरी नाम भएकी ती युवतीको हत्यापछि कारको सिटमुनि शव लुकाएर फ्याँकेको खुलासा भएको छ । उनीहरुले छिमेकी सहगोत्री युवकसँग लुकेर मन्दिरमा विवाह गरेको आशंकासहित हत्या गरेका हुन् ।
मोबाइलमा युवतीसँग सम्पर्क नभएपछि ती युवक प्रहरीकोमा पुगेका थिए । हत्या गरेको २२ दिनपछि घटनाबारे प्रहरीले जानकारी पाएको थियो । पक्राउ परेपछि परिवारका सदस्यहरुले छोरीले जति सम्झाउँदा पनि छोरीले नमानेपछि हत्या गर्नुपरेको बयान दिएका छन् । सहगोत्री छिमेकीसँग ३ वर्षदेखि गोप्य सम्बन्ध रहेको र एक वर्षअघि लुकीछिपी विवाह गरेको भन्दै उनीहरुले छोरीलाई सम्बन्ध तोड्न दबाव दिएका थिए ।
३० जनावरीपछि शितलसँग उनको साथीको न भेट भयो न सम्पर्क । उनले नजिकै खोजे । नभेटेपछि १७ फेब्रुअरी प्रहरी चौकी पुगेर उजुरी दिए । प्रहरीले उजुरी दर्ता गरेर अनुसन्धान सुरु गर्यो ।
प्रहरीले छोरी खोई भन्दा आफन्तकोमा गएको जवाफ पाएका थिए । तब परिवारप्रति नै शंका लागेर प्रहरीले कल डिटेल निकाल्न थाल्यो । कल डिटेलको आधारमा खोजतलाश गर्दा परिवारले अपराध स्वीकारेको दिल्ली प्रहरीले जानकारी दिएको छ ।
परिवारका सदस्यहरुले ३० जनवरीकै दिन छोरीको हत्या गरेर नहरमा फ्याँकिदिएको बताए । उनीहरु दुई कार लिएर अलिगढ पुगेका थिए ।
उज्यालो प्रतिनिधि
बुद्ध लोप्चन