उज्यालो प्रतिनिधि
सर्ट भिडियो मेकिङ एप टिकटकमा पछिल्लो समयमा एक नयाँ खतरनाक च्यालेन्ज ट्रेण्डिङ बनिरहेको छ ।
ट्रिपिङ्ग जम्प अर्थात् स्कल ब्रेकर भनिने उक्त अनौठो स्पर्धा विश्वका धेरै ठाउँमा विद्यालय तथा अभिभावकहरूका लागि टाउको दुखाइको विषय बनिसकेको छ । टिकटकको यो खतरनाक खेलका कारण अहिलेसम्म केही किशोर किशोरी विद्यार्थीहरू घाइते बनिसकेका छन् ।
युरोप तथा अमेरिकाका विभिन्न ठाउँका स्कुले विद्यार्थीहरूले टिकटकको यो च्यालेन्जमा भाग लिएका जोखिमपूर्ण भिडियोहरू टिकटकमा भाइरल बनिरहेका छन् ।
टिकटकमा भाइरल बनिरहेको यो च्यालेन्जमा तिनजना मानिसहरू लहरै उभिन्छन्, एकजना बीचमा र अरु दुईजना उसको दायाँ बायाँ । त्यसपछि बीचमा रहेको मानिस माथि उफ्रिन्छ र त्यो बेला दायाँ बयाँ रहेका मान्छेले उसको खुट्टामा लात्ताले हिर्काउँछन् । यसो गर्दा उफ्रिने व्यक्ति भुइँमा पछारिन्छ ।
उफ्रिने मानिस भुइँमा पछारिने भएकैले यो च्यालेन्जलाई स्कल ब्रेकर अर्थात् खप्पर फोर्ने च्यालेन्ज पनि भनिएको हो ।
युरोप र दक्षिण अमेरिकामा विद्यार्थीहरूबीच टिकटकको यो च्यालेन्जमा सहभागी भई ज्यानै जोखिममा पार्ने क्रम बढेपछि कतिपय विद्यालयहरूले अभिभावकका लागि चेतावनी नै जारी गर्नुपरेको बताइएको छ ।
डाक्टरहरूका अनुसार यो च्यालेन्ज निकै जोखिमपूर्ण छ र यसमा भुइँमा पछारिने व्यक्तिको सरीरका जुनसुकै हड्डी भाँचिने तथा जिउमा चोटपटक लाग्ने जोखिम हुन्छ ।
एजेन्सी
उज्यालो प्रतिनिधि
