काठमाडौँ । गायिका सुस्मिता स्याङतानको आवाजमा ‘कुलमानलाई फालेर’ बोलको गीत सार्वजनिक गरिएको छ ।   देशको ऊर्जा क्षेत्रमा क्रान्ति ल्याउने व्यक्तित्व कुलमान घिसिङको सम्मानमा समर्पित एक सशक्त देशभक्तिपूर्ण गीत ‘कुलमानलाई फालेर’ शीर्षकमा तयार पारिएको छ । गीत गायिका सुस्मिता स्याङतानको युट्युब च्यानलमार्फत सार्वजनिक गरिएको हो, जसले छोटो समयमै जनमानसको ध्यान खिच्न सफल भएको छ ।

यो गीत केवल संगीतमा सीमित छैन — यसले नेपाली समाजको गहिरो पीडा, जनताका अपेक्षा, र इमानदार नेतृत्वप्रतिको सम्मानलाई आवाज दिएको छ। कुलमान घिसिङ जसले आफ्नो निष्कलंक सेवा र समर्पणबाट लोडसेडिङको अँध्यारो हटाएर नेपाललाई उज्यालोतर्फ डोहो¥याए, उनीमाथि भएको राजनीतिक हस्तक्षेप र असमय विदाइको सन्दर्भमा यो गीतले कठोर प्रश्न उठाएको छ।

गीतमा प्रस्तुत गरिएका भावहरूले एउटा सशक्त सामाजिक सन्देश बोकेको छ — इमानदार मानिसहरूको निरन्तर योगदान आवश्यक छ, तर तिनै मानिसहरूलाई हटाउने प्रवृत्ति हाम्रो राजनीतिक संरचनाको गम्भीर कमजोरी हो। यही यथार्थलाई गीतकार एवम पत्रकार विवेक लोप्चनले शब्द अत्यन्त मार्मिक ढंगले व्यक्त गरेका छन् । कुनसाङ दोर्जे लोप्चनको संगीत संयोजनले गीतको सम्पूर्ण प्रभावलाई थप सशक्त बनाएको छ, भने अर्जुन न्यौपानेको सहयोगी स्वरले भावनाको गहिराइ अझै बढाएको छ। ध्वनि सम्पादन, मिक्सिङ र मास्टरिङ गोविन्द सोनीले गरेका हुन्, जसले गीतलाई प्राविधिक रूपमा उत्कृष्ट बनाउन महत्त्वपूर्ण भूमिका खेलेका छन्।

रेकर्डिङ कार्य सबिर कार्कीको संयोजनमा काठमाडौंको हुरी रेकर्डिङ स्टुडियो, कुपण्डोलमा सम्पन्न भएको हो। अत्यन्त मिहिनेतका साथ तयार पारिएको यो गीतको भिडियो पक्ष पनि प्रशंसनीय छ । निर्देशक तथा क्यामराम्यान विशाल सापकोटाले दृश्यहरूमा भावनात्मक गहिराइ ल्याएका छन्।  सम्पादन तथा रंग संयोजनमा त्रिलोक लामाको दक्षता झल्किन्छ, जसले गीतको सन्देशलाई भिडियोमार्फत दर्शकसमक्ष अझ सजीव बनाएको छ । यो गीतले दर्शक र श्रोतामाझ एक प्रकारको चेतनाको ज्वार ल्याएको छ। सामाजिक सञ्जालमा थुप्रै प्रयोगकर्ताहरूले यसलाई ‘साँचो जनताको आवाज’ भन्दै सेयर गरिरहेका छन्। विशेषगरी युवापुस्ताले यो गीतलाई केवल सांगीतिक सामग्री नभई सामाजिक न्याय र नेतृत्वको सदाचारका लागि आवाज उठाउने अभियानका रूपमा लिएको देखिन्छ।

देशमा इमानदार, कर्तव्यनिष्ठ र परिणाममुखी नेताको कदर गर्ने संस्कृति अभावमा जस्तै कुलमान घिसिङजस्ता पात्रलाई हटाइन्छ, त्यसविरुद्ध यो गीत एउटा सशक्त सांगीतिक प्रतिरोध पनि बनेको छ। ‘कुलमानलाई फालेर’ अब केवल एउटा गीत होइन, यो आम जनताको भावना, अपेक्षा र आवाज बनेर उठेको एक सांस्कृतिक आन्दोलनजस्तै देखिन थालेको छ। राष्ट्रलाई सही नेतृत्वको खाँचो छ भन्ने मर्मस्पर्शी सन्देश यस गीतले सम्पूर्ण नेपाली हृदयमा गहिरो प्रभाव छाडेको छ।