उज्यालो प्रतिनिधि
काठमाडौं । अन्तर्राष्ट्रिय तामाङ परिषदको आयोजनामा काठमाडौंमा दुई दिने विषयगत समितिहरुको विज्ञ भेला सुरु भएको छ ।
शनिबारदेखि सुरु भएको विज्ञ भेलाको व्यवस्थापन नेपाल तामाङ घेदुङले गरेको छ । भेलामा ९ देशका प्रतिनिधिहरुको भौतिक उपस्थिति रहेको र १५ देशका प्रतिनिधिले भर्चुअल माध्यमबाट सहभागिता जनाउने परिषदका महासचिव टासी लामाले उज्यालो नेटवर्कलाई जानकारी दिए ।
‘विश्वका तामाङहरु एक हौँ, तामाङ सभ्यताको प्रवद्र्धन र विकास गरौँ’ भन्ने मुल नारासहित सुरु भएको विज्ञ भेलामा विभिन्न समितिहरुको विज्ञहरुबीच विचार मन्थन हुनेछ ।
परिषद्को संस्कृति पुनः उत्थान समिति, तामाङ कला, सँस्कृति, साहित्य तथा इतिहास लेखन समिति, तामाङ मानवअधिकार प्रवद्र्धन समिति, भाषा, लिपि तथा शिक्षा प्रवद्र्धन समिति, अध्ययन, अनुसन्धान तथा क्षमता अभिवृद्धि समिति र अन्तर्राष्ट्रिय उच्च स्तरीय तामाङ पञ्चाङ्ग समिति रहेका छन् ।
परिषद्को विज्ञ भेला बागमती प्रदेशका मुख्यमन्त्री बहादुर सिंह लामा तामाङले उदघाटन गरे । उदघाटन सत्रमा बोल्दै मुख्यमन्त्री लामाले विश्वभरका तामाङहरु भावनासहित एकता गर्नका लागि भेलाले भूमिका निर्वाह गर्नुपर्नेमा जोड दिए । साथै तामाङ भाषाको लिपीको सन्दर्भमा जारी विवाद समाधान गर्नुपर्ने उनको जोड थियो ।
तर, उदघाटन सत्रमै मन्तव्य दिएका अन्य अतिथिले भने प्रमुख अतिथि समेत रहेका मुख्यमन्त्री लामाको भनाईको खण्डन गरेका छन् । परिषदका संस्थापक अध्यक्ष परशुराम तामाङले भने, ‘लिपीको सन्दर्भमा हामीले एकमतका साथ निर्णय गरिसकेका छौँ, संस्थागत निर्णयका बारेमा हामी एकमत छौँ, यसमा कुनै विवाद छैन ।’
उज्यालो प्रतिनिधि