हेटाैंडा ।बागमती प्रदेश सरकारका प्रवक्ता, आन्तरिक मामिला तथा कानुनमन्त्री गंगानारायण श्रेष्ठले मानिसबाट भइरहेको पृथ्वीकाे विनाशबाट बचाउनका लागि आवश्यक काम गर्नु सबैकाे दायित्व भएको बताएका छन् ।

साेमबार हेटौंडामा आयोजित ‘विश्वव्यापी रूपमा अभिप्रेरित, स्थानीय रुपमा सशक्तीकृत : जलवायु सम्बन्धी गतिविधिमा जुनियर तथा युवा’ भन्ने मूल नाराका साथ आयोजना गरिएको पाँचौ प्रदेश स्तरीय जुनियर/ युवा रेडक्रस शिविर कार्यक्रमकाे उद्घाटन गर्दै उहाँले यस्तो बताएका हुन । उनले पर्यावरण विनाश, जलवायु परिवर्तन र पृथ्वीको तापक्रममा निरन्तरको वृद्धिले मानव जातिको अस्तित्व नै संकटमा पर्दै गइरहेको बताए । उनले हिमालमा हिउँ पग्लने, समुन्द्री सतहको वृद्धि, अत्याधिक कार्वन उत्सर्जन र वायुमण्डलमा बढिरहेको प्रदुषणले पृथ्वीको अस्तित्व पनि संकटमा पर्दै गइरहेको बताए । उहाँले मानिसद्वारा भइरहेको पृथ्वीको विनाशबाट बचाउनका लागि आवश्यक काम गर्नु सबैको दायित्व भएको बताए । उनले युवाहरु राष्ट्रका आर्थिक, सामाजिक, राजनीतिक, सांस्कृतिक र शैक्षिक क्षेत्रका अग्रदूत तथा परिवर्तनका बाहक भएको भन्दै उनीहरूले मानवीय सेवा कार्यलाई प्रभावकारी बनाउनु पर्ने बताए । उनले युवाहरुले समुदायको दुःख र पीडामा सहयोगी भूमिका निर्वाह गर्नुपर्नेमा जाेड दिए ।

मन्त्री श्रेष्ठले युवाहरूको सीप र दक्षता अभिबृद्धि गराएर मात्रै जलवायु परिवर्तनबाट उत्पन्न समस्यालाई सम्बोधन गर्न सम्भव हुने बताए ।मन्त्री श्रेष्ठले बागमती प्रदेश सरकार नेपाल रेडक्रस सोसाइटीसँग सहकार्य गर्दै अघि बढिरहेकाे बताए । उनले हाल सरकारी अस्पतालमा मात्रै रगत उपलब्धता गरिँदै आएकोमा आगामी दिनमा सम्पूर्ण रूपमा नि:शुल्क रगत उपलब्धता गर्न पहल गरिने पनि बताए ।