एजेन्सी – टोटेनहम हट्सपरले इंग्लिस प्रिमियर लिग अन्तर्गत शनिबार म्यानचेस्टर युनाइटेडलाई हराएको छ । लन्डन टोलीले घरेलु मैदानमा युनाइटेडमाथि २-० को जित दर्ता गरेको हो ।

खेलमा दुवै गोल दोस्रो हाफमा सम्भव भएको थियो । पहिलो हाफमा दुवै टोलीले पाएको अवसर सदुपयोग गर्न सकेनन् । टोटेनहमका लागि पहिलो हाफको अन्त्यतिर पेड्रो पारोले गरेको प्रहार क्रसबारमा लागेर फर्किएको थियो ।

टोटेनहमका गोलरक्षक गुग्लिएल्मो भिकारियोले दुई उत्कृष्ट बचाउ गर्दै खेल गोलरहित राखेका थिए । दोस्रो हाफको सुरुवातमै स्पर्सले अग्रता लियो । पापे माटर सारले ६ यार्ड बक्स भित्रबाट क्लियर नभएको बललाई गोलमा परिणत गरे ।

युनाइटेडका एन्टोनिको प्रहार पोस्टमा लागेर फर्कंदा युनाइटेड बराबरी गर्नबाट चुकेको थियो । त्यसपछि गोलरक्षक भिकारियोले पुन: २ बचाउ गरे । खेलको अन्त्यमा टोटेनहमले अग्रता दोब्बर पार्यो ।

युनाइटेडका डिफेन्डर लिसान्द्रो मार्टिनेजले बायाँ विंगबाट खेलेको पासलाई आफ्नै पोस्टको दिशा दिएपछि स्पर्सको जित पक्का भएको थियो । टोटेनहम पहिलो खेलमा ब्रेन्टफर्डसँग २-२ को बराबरीमा रोकिँदा युनाइटेडले वल्भ्सलाई १-० ले हराएको थियो ।