उज्यालो प्रतिनिधि
काठमाडौं । अभिनेता डीबी बम्जनले चलचित्र कलाकार सङ्घको आसन्न निर्वाचनमा उपाध्यक्ष पदमा उम्मेदवारी दिने घोषणा गरेका छन् । अध्यक्षका उम्मेदवार सविन श्रेष्ठको प्यानलबाट उम्मेदवारी दिन लागेको बम्जनले बताएका छन् ।
नयाँ पुस्तालाई नेतृत्व दिएर कलाकार सङ्घलाई अघि बढाउन आग्रह गर्दै उनले देशभरका कलाकारको पेसागत हकहितलाई चुनावी एजेण्डाको रूपमा अघि सारेका छन् ।
“यहाँहरूको सल्लाह र सुझाव लाई आत्मासाथ गर्दै, मेरो अनुभव र सीप लाई समेटेर सबै सँग हातेमालो गर्दै चलचित्र कलाकार सङ्घलाई अझ गतिशील बनाउन अग्रसर रहनेछु”, बम्जनले भने, “हजुरहरूको साथ र सहयोगको अपेक्षा गर्दछु ।”
अभिनेता बम्जन नेपाली चलचित्रका चर्चित खलनायक समेत हुन् । बम्जनले ‘धुँवा यो नशा’बाट अभिनय करिअर थालेका थिए । आगामी चैत ४ गते हुने कलाकार सङ्घको महाधिवेशनमा युवापुस्ताका उम्मेदवारको प्यानल बनाएर अघि बढ्ने उनले बताए ।
अभिनेता बम्जनले धुँवा यो नशासहित रेलीमाई, हिरो रिटर्न्स, रुमालै छ चिनो, छिरिङ, फिर्केमा अभिनय गरेका छन् । निर्माण हुन लागेको नयाँ फिल्मका उनी निर्माता समेत हुन् ।
नेपाली चलचित्रका कलाकारको छाता संस्था समेत रहेको कलाकार सङ्घको अध्यक्षमा आजै अभिनेता सविन श्रेष्ठले पनि उम्मेदवारी घोषणा गरेका छन् ।
उज्यालो प्रतिनिधि
बुद्ध लोप्चन